TIRANË – Kreu i Partia e Lirisë, Ilir Meta, ka kërkuar thirrjen si dëshmitar të kryeministrit Edi Rama në procesin gjyqësor që po zhvillohet ndaj tij.

Gjatë seancës, Meta deklaroi se dëshmia e Ramës është e rëndësishme për të sqaruar rrethanat që lidhen me ndryshimet në ligjin për minierat dhe procesin e vendimmarrjes që ka shoqëruar miratimin e tij. Në listën e dëshmitarëve të propozuar prej tij përfshihen gjithashtu ish-kryetari i Kuvendit, Gramoz Ruçi, si dhe deputeti socialist Taulant Balla.

Meta kërkoi gjithashtu angazhimin e një eksperti të pavarur në fushën e minierave, me qëllim verifikimin e efekteve që kanë sjellë ndryshimet ligjore dhe identifikimin e subjekteve që mund të kenë përfituar prej tyre.

“Në këtë çështje duhet të vijë Edi Rama, duhet të vijë edhe drejtuesi i grupit parlamentar të PS-së. Kurrë nuk kam diskutuar me askënd për të marrë apo lënë një banesë. Të gjitha këto janë lidhje absurde, pasi nuk ekziston asnjë provë konkrete”, u shpreh Meta gjatë deklaratës së tij në gjykatë.

Në vijim të qëndrimit të tij, ai hodhi poshtë akuzat që lidhen me pasuritë e paluajtshme, duke i cilësuar ato si pretendime të pabazuara dhe “montazhe”, ndërsa dha shpjegime edhe për lëvizjet e tij ndër vite nga një banesë në tjetrën.

Kërkesa e Metës për thirrjen e dëshmitarëve pritet të shqyrtohet nga gjykata, e cila do të vendosë nëse personat e propozuar do të dëshmojnë në kuadër të procesit gjyqësor.