Mbretëria e Bashkuar ka pësuar ndryshime rrënjësore dhe ka ndërruar plot gjashtë kryeministra që prej vitit 2011, por një banor i vetëm brenda rezidencës zyrtare në "Downing Street 10" ka mbetur i palëkundur: macja Larry. Ndërsa liderët politikë kanë ardhur dhe janë larguar si pasojë e krizave apo zgjedhjeve, Larry ka ruajtur postin e tij, duke u kthyer në një nga figurat më popullore dhe më të qëndrueshme të skenës publike britanike.

Që nga dita e parë e "emërimit" të tij në shkurt të vitit 2011, macja Larry ka bashkëjetuar dhe ka përcjellë nga detyra pesë ish-kryeministra dhe po ndjek aktualisht mandatin e të gjashtit. Ai ka parë nga afër epokat politike të David Cameron, Theresa May, Boris Johnson, Liz Truss (e cila qëndroi vetëm 45 ditë), Rishi Sunak dhe së fundmi liderin aktual, Keir Starmer.

Përgjatë gjithë kësaj periudhe, Larry ka mbajtur pa ndërprerje titullin zyrtar mjaft unik: "Përgjegjës kryesor për kapjen e minjve në Kabinet" (Chief Mouser to the Cabinet Office).

Përtej rolit të tij simbolik në kontrollin e dëmtuesve, Larry është shndërruar në një yll të vërtetë mediatik. Ai fotografohet rregullisht nga gazetarët në shkallët e rezidencës, pozon pranë liderëve botërorë gjatë vizitave shtetërore dhe shpesh "vjedh" vëmendjen në transmetimet direkte të lajmeve. Për shumë qytetarë britanikë, në një kohë kur politika e vendit u përfshi nga paqëndrueshmëria dhe ndryshimet e shpeshta, macja Larry mbetet institucioni më konstant dhe më i dashur i shtetit.