Kryeministri Edi Rama ka detajuar shtyllat operative të programit të ri infrastrukturor, duke u ndalur specifikisht te modernizimi i transportit publik, ngritja e një rrjeti logjistik kombëtar për pushtetin vendor si dhe zgjidhjet e reja financiare për menaxhimin e parkimeve në qytetet me ngarkesë të lartë turistike dhe qarkullimi.

Sipas kreut të qeverisë, synimi është rritja e kapaciteteve të munguara të bashkive përmes një partneriteti të ngushtë me qeverisjen qendrore.

Transporti urban dhe interurban: Kalimi te autobusët elektrikë

Duke e cilësuar transportin e sezonit të pikut si "hallkën më të dobët" aktuale, Rama prezantoi modelin e ri të administrimit:

Gjeneratë e gjelbër: Synohet që mjetet e reja të transportit publik të jenë tërësisht elektrike, me zero ndotje në mjedis.

Skema e bashkëpunimit: Qeveria dhe bashkitë do të bashkëfinansojnë dhe sigurojnë mjetet, ndërsa administrimi dhe përdorimi i tyre do të bëhet direkt nga vetë bashkitë. Si model suksesi u përmend rasti i Lezhës.

Parku Logjistik Kombëtar në shërbim të bashkive

Një tjetër risi është shtrirja në të gjithë territorin e një parku logjistik të dedikuar për pushtetin vendor. Ky park do t’u sigurojë bashkive kapacitete teknike dhe makineri që deri më sot u kanë munguar për:

Hapjen dhe mirëmbajtjen e kanaleve kulluese dhe ujitëse.

Ndërhyrjet e domosdoshme dhe menaxhimin e situatave post-emergjencë.

Tri formulat e reja për infrastrukturën e parkimeve

Për të adresuar ngarkesën e lartë në qytetet kryesore dhe zonat turistike, çdo bashki do të ketë një plan të shkruar menaxhimi. Ndërtimi i këtyre hapësirave do të bëhet përmes tri mundësive të ndryshme financimi:

Formula e parë: Financimi direkt

Parashikon ndërtimin dhe investimin e drejtpërdrejtë në infrastrukturën e parkimeve përmes Fondit Shqiptar të Zhvillimit (FSHZH), duke ndjekur modelet e suksesshme që janë zbatuar tashmë në Berat dhe Gjirokastër.

Formula e dytë: Aksesi në kredi bankare

Kjo skemë u mundëson bashkive të aksesojnë institucionet bankare duke paraqitur projekte specifike dhe të garantuara për parkimet, çka sjell vetëfinanciara në afatgjatë përmes tarifimit.

Formula e tretë: Partneriteti publik-privat

Ky opsion bazohet në bashkëpunimin me subjekte private në territore të caktuara brenda lagjeve ku është marrë e drejta e pronës. Ky format synon ndërtimin e një infrastrukture parkimi shumë më fitimprurëse dhe njëkohësisht miqësore me komunitetin e zonës.

Pjesë nga fjala e Ramës:

“Së dyti, do të adresojmë nevojën për të cuar në një nivel tjetër transportin urban dhe interurban. Transporti i periudhës së sezonit të pikut hallka jonë më e dobët. Qëllimi është të hyjmë në një fazë ku gjenerata e re e mjeteve të transportit publik të jetë tërësisht e gjelbër, pra autobusë elektrikë me zero ndotje. Dhe së dyti për të ndërtuar një sistem të përdorimin dhe administrimit të këtyre mjeteve nën administrimin e bashkive. Do të jetë qeveria bashkë me bashkitë që do sigurojnë mjetet dhe bashkitë do bëjnë administrimin e tyre, sjell këtu shembullin e Lezhës dhe parkun logjistik atje.

Do e shtrijmë në të gjithë territorin, do kemi një park logjistik që do i shërbejë bashkive për gjithë ato punime të domosdoshme për hapjen e kanaleve kulluese, ujitëse etj. Apo për situata postemergjencë që bashkitë të zotërojnë një kapacitet të munguar deri më sot. Do mbështesim një program për të krijuar kapacitete më domethënëse për parkimet, sidomos në qytetet me intisitet të lartë qarkullimi, sidomos në zona me ngarkesë specifike prej turizmit.

Programi i parkimeve ka disa komponentë, të gjitha bashkitë do kenë programin e shkruar. Kemi disa formula, përvec financimit direkt, të punës për ndërtimin e tyre, përmes fondit të zhvillimit, si Berat apo Gjirokastër, por edhe një tjetër formulë për ti mundësuar bashkive të aksesojnë bankat me projekte specifike të parkimeve apo të bashkëpunojnë me subjekte private të marrin pjesë në bashkëpunim në ato territore që i përdorin në lagje, ku kanë marrë të drejtën e pronës, por mund të angazhohen për të ndërtuar një infrastrukturë parkimesh shumë më fitimprurëse dhe shumë miqësore me komunitetin”,