Kryeministri Edi Rama ka ndarë në rrjetet sociale një video dhe një reflektim të gjatë të një qytetari të panjohur nën profilin "@mr.elprofe", i cili ka krijuar një këngë dhe një mesazh mbi realitetin shqiptar. Përmes këtij postimi, qytetari shpjegon se ka tentuar të vendosë veten në pozicionin e kreut të qeverisë për të kuptuar peshën e vendimmarrjes, duke specifikuar se këtë nuk e bën për lajka, por si një përpjekje për të parë "anën tjetër të historisë".

Kreu i qeverisë e ka cilësuar këtë reagim si një "mesazh bujar" mes shumë komunikimeve të përditshme, duke ua përcjellë ndjekësve si një thirrje për reflektim mbi vështirësitë, gabimet dhe arritjet e vendit përgjatë viteve. Reflektimi i qytetarit: "I shari shan, i mençuri mendon"

Në tekstin e shpërndarë nga kryeministri, qytetari sqaron pozicionin e tij autonom dhe arsyet që e shtynë të realizonte këtë projekt muzikor e tekstual, duke iu kundërvënë rrymave të përditshme të debatit publik:

Pavarësia ekonomike dhe politike: Qytetari thekson prerazi se nuk ka interesa financiare me strukturat publike. "Unë nuk ha bukë nga shteti shqiptar që prej vitit 1997. Nuk jam as i shitur, as i blerë. Dhe nuk mbështes verbërisht askënd," shprehet ai.

Krahasimi me të shkuarën: Në mesazh përmendet ndryshimi i infrastrukturës dhe jetesës në vend, duke kujtuar fëmijërinë ose rinia në një Shqipëri ku "nuk bëje dot 200 metra pa t’u grisur këpucët."

Pranimi i gabimeve: Autori i mesazhit shton se pranimi i të mirave nuk do të thotë se çdo gjë është perfekte apo se nuk janë bërë gabime, por nisma e tij është një përpjekje për të sjellë një bilanc objektiv.

Mesazhi, i cili mbyllet me frazën anglisht "I Carried The Storm" (Unë e mbajta stuhinë), parashikon edhe reagimet negative, ndaj të cilave qytetari përgjigjet shkurt: "E di që do shahem. Por s’ka problem. Sepse në fund të fundit: I shari shan. I mençuri mendon."

Postimi i plotë:

"MIRËMËNGJES

dhe me një nga mesazhet e shumta të këtyre ditëve të habitshme në të keq e në të mirë, të cilin dikush bujarisht e ka postuar e një tjetër miqësisht ma ka dërguar, ju uroj një ditë të mbarë

Ja profili i të panjohurit bujar që më çoi miku me statusin e postimit të videos

@mr.elprofe

Provova t’i vesh për pak çaste këpucët e kryeministrit.

Jo për t’i bërë lajka. Jo për të bindur askënd.

Thjesht për të parë si do ta shihja unë botën në vendin e tij.

Jam rritur në një Shqipëri ku nuk bëje dot 200 metra pa t’u grisur këpucët.

Do të ishim naivë po të thoshim se nuk janë bërë edhe gjëra të mira.

Kjo nuk do të thotë se çdo gjë është perfekte. As që nuk janë bërë gabime.

Por për sqarim:

Unë nuk ha bukë nga shteti shqiptar që prej vitit 1997.

Nuk jam as i shitur. As i blerë.

Dhe nuk mbështes verbërisht askënd.

Kjo këngë është thjesht një përpjekje për të parë anën tjetër të historisë.

Një kundërrrymë ndaj asaj që dëgjojmë çdo ditë.

E di që do shahem.

Por s’ka problem.

Sepse në fund të fundit:

I shari shan. I mençuri mendon.

I Carried The Storm", shkruan Rama