Në kantonin Aargau është gjetur trupi i pajetë i 5-vjeçarit shqiptar Tian Rahimi, i cili ishte shpallur i zhdukur pas një aksidenti me gomone në lumin Reuss.

Sipas autoriteteve zvicerane, trupi i fëmijës u gjet në zonën e Merenschwand pas disa ditësh kërkimesh intensive.

Ngjarja ndodhi më 20 qershor, kur gomonia ku ndodhej fëmija me familjen u përplas me një pengesë në lumë dhe u përmbys pranë zonës së Mühlau. Prindërit dhe motra e tij arritën të shpëtojnë, ndërsa 5-vjeçari u mor nga rryma e fortë e ujit.

Operacionet e kërkimit përfshinë policinë, zjarrfikësit, ekipe shpëtimi, zhytës dhe dronë, si dhe vullnetarë që morën pjesë në kërkimet përgjatë lumit.

Autoritetet konfirmuan gjetjen e një fëmije të pajetë, ndërsa identiteti i tij u lidh më pas me vogëlushin shqiptar të zhdukur. Ngjarja ka shkaktuar tronditje të madhe në komunitetin shqiptar në Zvicër dhe më gjerë.

Hetimet mbi rrethanat e aksidentit po vazhdojnë.