Kryeministri Edi Rama ka ndarë detaje nga takimi i zhvilluar në Paris me presidentin francez Emmanuel Macron, duke e cilësuar marrëdhënien mes dy vendeve si të avancuar në një nivel strategjik.

Sipas Ramës, në diskutime është përfshirë edhe projekti për rilindjen e Liceu Francez i Korçës, i cili, sipas tij, tashmë ndodhet në vëmendjen e presidencës franceze si një nga projektet e mbështetura pas vizitës së mëparshme të Macron në Shqipëri.

Kryeministri theksoi se vetëm një dekadë më parë do të ishte e paimagjinueshme që Shqipëria të konsiderohej partner strategjik i Francës në rajonin e Ballkanit, ndërsa sot, sipas tij, kjo marrëdhënie është forcuar ndjeshëm.

Rama e shoqëroi mesazhin e tij me foto nga takimi, duke e cilësuar zhvillimin e marrëdhënieve dypalëshe si një moment të rëndësishëm për diplomacinë shqiptare.