TIRANË, 23 qershor 2026 – Analizat e ADN-së kanë konfirmuar se trupi i pajetë i gjetur më 18 qershor në zonën e Cerrunjës i përket 34-vjeçarit Eglant Koçi, i cili ishte raportuar i zhdukur që prej fillimit të muajit.

Trupi u zbulua në lagjen Domush të fshatit Cerrunjë në gjendje të avancuar dekompozimi. Identifikimi u mundësua përmes ekspertizës së ADN-së, ndërsa autoritetet u orientuan fillimisht nga disa elementë identifikues, përfshirë një shenjë operacioni, numrin e këmbës dhe veshjet që viktima kishte pasur kur ishte parë për herë të fundit.

Pas konfirmimit zyrtar të identitetit, familjarët pritet të tërheqin trupin nga morgu i Tiranës për kryerjen e ceremonive mortore.

Hetimet

Sipas të dhënave paraprake të hetimit, personi i dyshuar kryesor për rrëmbimin dhe vrasjen e Eglant Koçit është 41-vjeçari Armand Shakaj, i cili vijon të jetë në kërkim. Autoritetet dyshojnë se ai është ndihmuar nga 25-vjeçari Enea Zyferi, i cili është arrestuar dhe po hetohet për rolin e tij në ngjarje.

Hetuesit kanë arritur të lokalizojnë motorin e viktimës, si dhe ambientin ku dyshohet se ai është mbajtur para se të humbiste jetën. Pamjet e siguruara nga kamerat e sigurisë tregojnë se nga ky vend largohet me automjet i dyshuari kryesor, ndërsa ekzistojnë dyshime se në mjet mund të ketë qenë edhe trupi i viktimës.

Sipas policisë, për të fshehur gjurmët e krimit, motori i Koçit është zhvendosur nga vendi ku dyshohet se ndodhi ngjarja drejt zonës së 5 Majit në Tiranë, ku u gjet disa ditë më vonë.

Zhdukja e 34-vjeçarit

Eglant Koçi u pa për herë të fundit më 4 qershor në zonën pranë sheshit “Wilson” në Tiranë, teksa lëvizte me motorin e tij. Përmes analizimit të kamerave të sigurisë, policia ka rindërtuar një pjesë të itinerarit të tij në kryeqytet para zhdukjes.

Viktima rezultonte i punësuar në një mobileri, ndërsa një nga pistat hetimore lidhet me aktivitetin e tij të dyshuar në fushën e kriptomonedhave. Megjithatë, autoritetet nuk kanë dalë ende në një përfundim zyrtar mbi motivet e ngjarjes.

Hetimet vijojnë për zbardhjen e plotë të rrethanave të krimit dhe për lokalizimin e të dyshuarit kryesor, Armand Shakaj.