PARIS, 23 qershor 2026 – Franca ka regjistruar natën më të nxehtë që nga fillimi i matjeve meteorologjike në vitin 1947, ndërsa vala ekstreme e të nxehtit që ka përfshirë vendin prej më shumë se një jave ka shkaktuar të paktën 40 viktima.

Kryeministri francez, Sebastien Lecornu, deklaroi se numri i viktimave nga 18 qershori e deri më tani ka arritur në 40 persona, shumica prej tyre të rinj, duke e cilësuar situatën si një “tragjedi të madhe”.

“Shifra e fundit që na është raportuar është 40 të vdekur që nga 18 qershori. Këto janë viktimat e para të krizës me të cilën po përballemi”, tha ai gjatë një mbledhjeje emergjente të qeverisë.

Sipas agjencisë meteorologjike franceze Météo-France, temperatura mesatare gjatë natës së 22-23 qershorit arriti në 21.6 gradë Celsius në nivel kombëtar, duke thyer rekordin e mëparshëm prej 21.4 gradësh të regjistruar në vitin 2019.

Vala e të nxehtit ka shkaktuar probleme të shumta në jetën e përditshme. Autoritetet kanë mbyllur dhjetëra shkolla, kanë anuluar linja hekurudhore dhe kanë vendosur masa shtesë për mbrojtjen e popullsisë nga temperaturat ekstreme.

Në shumë zona të vendit, qytetarët po kërkojnë mënyra për t’u freskuar duke u hedhur në lumenj dhe kanale. Megjithatë, ministrja franceze e Sportit, Marina Ferrari, u bëri thirrje qytetarëve të shmangin notin në zona të paautorizuara ose të rrezikshme.

Ekspertët e motit shpjegojnë se fenomeni është shkaktuar nga i ashtuquajturi “Omega Block”, një konfigurim atmosferik që bllokon masat ajrore dhe favorizon grumbullimin e ajrit shumë të nxehtë mbi Evropën Perëndimore, duke bërë që temperaturat të rriten dita-ditës.

Ndërkohë, temperaturat ekstreme po prekin edhe pjesë të tjera të kontinentit. Në Itali, autoritetet kanë shpallur nivelin maksimal të alarmit për 15 qytete, ndërsa në Mbretëria e Bashkuar meteorologët parashikojnë temperatura deri në 37 gradë Celsius në jug të Anglisë, duke rrezikuar vendosjen e një rekordi të ri për muajin qershor.

Temperatura të larta po regjistrohen gjithashtu në disa vende të Ballkanit dhe rajone të tjera të Evropës. Shkencëtarët paralajmërojnë se valët e të nxehtit po bëhen gjithnjë e më të shpeshta, më të gjata dhe më intensive si pasojë e ndryshimeve klimatike dhe ngrohjes globale.