Një debat i hapur ka shpërthyer brenda radhëve të Partisë Socialiste, duke përfshirë ish-ministren e Jashtme dhe deputeten Elisa Spiropali dhe kryetaren e PS-së në Shkodër, Mirela Dodaj. Shkak është bërë një deklaratë e Spiropalit dy ditë më parë, e cila bëri thirrje për një proces vetëpastrimi brenda strukturave të mazhorancës, “pa smërçe, pa ndryshqe, pa pehlivanllëqe”.

Kjo deklaratë ka sjellë reagimin e menjëhershëm dhe të ashpër të kreut të socialistëve të Shkodrës, Mirela Dodaj, e cila iu kthye drejtpërdrejt deputetes: “Nëse vërtet duhet të nisë një proces vetëpastrimi në Partinë Socialiste, atëherë do të ishte e ndershme të fillonte nga ju, Elisa Spiropali”.

Përgjigjja e Spiropalit: Letërsi kundër "fletë-rrufeve" digjitale

Ditën e sotme, Elisa Spiropali ka zgjedhur të reagojë publikisht, duke shmangur replikat e drejtpërdrejta politike dhe duke përdorur vargjet e poetes së njohur ruse, Anna Akhmatova (e lindur më 23 qershor 1889).

Përmes një postimi në rrjetet sociale, Spiropali ka ironizuar sulmet ndaj saj duke i cilësuar si konspiracione dhe gjuhë të shthurur, ndërsa ka përcjellë mesazhin se kritikat nuk e frikësojnë, por përkundrazi, shërbejnë si burim force.

"Kur t’ju merren mend’ e t’ju përzihet nga fletë-rrufetë, sulmet banale, monitorimi digjital e operacional, kontrolli algoritmik, konspiracionet halucinante, gjuha e shthurur, lexoni këtë kryevepër të Anna Ahmatovës," shkruan Spiropali.

Pjesë nga poezia e shpërndarë prej saj:

“Kaq shumë gurë hodhën përmbi mua / Sa sot asnjë prej tyre s’më frigon, / Me ta një kullë e hijshme u ndërtua, / M’e lartë se çdo kullë ajo qëndron. / Ndërtuesit e saj falënderoj, / Paçka se e ndërtuan me nxitim…”

Kjo përplasje publike vjen në një moment dinamik dhe me tensione të shtuara politike brenda dhe jashtë kampit socialist, ku debatet e ditëve të fundit po shtrihen nga reformat e brendshme partiake e deri te reagimet ndaj zhvillimeve dhe protestave të fundit në vend.

Postimi i Spiropalit:

Mirëmëngjes☀️ Kur t’ju merren mënd’ e t’ju përzihet nga fletë-rrufetë, sulmet banale, monitorimi digjital e operacional, kontrolli algoritmik, konspiracionet halucinante, gjuha e shthurur, lexoni këtë kryevepër të Anna Ahmatovës, që lindi si sot, më 1889. Kaq shumë gurë hodhën përmbi mua Sa sot asnjë prej tyre s’më frigon, Me ta një kullë e hijshme u ndërtua, M’e lartë se çdo kullë ajo qëndron. Ndërtuesit e saj falënderoj, Paçka se e ndërtuan me nxitim. Prej saj më shpejt agimin e shijoj Dhe diellin kqyr me gjatë në perëndim. Dhe në dritaren time ditë për ditë, Fryn erë deti, më flladit. Në dorën time pëllumbi vjen e çukit, E në mos mund të shkruaj më diçka, Një ditë të perëndishme krahëlehtë, Pres të vijë Muza, për ta shkruar vetë.