Kryeministri Edi Rama ka vijuar reagimet e tij të ashpra lidhur me protestat e fundit, duke shpërthyer këtë herë në akuza direkte ndaj ish-anëtarit të UÇK-së, Dritan Goxhaj. Përmes një postimi në rrjetet sociale, kreu i qeverisë ka publikuar një dokument duke cituar, sipas tij, reagimin e revoltuar të një qytetari që ka pësuar humbje familjare në luftë, i cili shprehej: “Po mos bre mos ja kajni nanën krejt, çfarë komandant i leshit more”.

Në fjalët e tij, Rama e ka cilësuar Goxhajn si një "manipulator gjysmë taleban e gjysmë mitoman", duke theksuar se askush nuk mund të hedhë baltë mbi flamurin e Ushtrisë Çlirimtare të Kosovës (UÇK).

Më tej, kryeministri ka lëshuar një paralajmërim të fortë lidhur me prapavijën e këtyre tubimeve, duke këmbëngulur se pas tyre fshihet një axhendë e huaj destabilizuese. Ai u është drejtuar kritikëve dhe organizatorëve duke thënë se kushdo që bën shaka me ndërhyrjen agresive të Iranit në këtë protestë, do të ndihet shumë i turpëruar përpara opinionit publik sapo e vërteta e plotë të dalë në dritë dhe "mjegulla e histerisë digjitale" të shpërndahet.

Postimi i Ramës:

“Po mos bre mos ja kajni nanën krejt, çfarë komandant i leshit more”… Këto ishin fjalët e një burri me disa të vrarë në familje, që i revoltuar me hosanatë e mbrojtësve të këtij tipit, më çoi dokumentin bashkëngjitur sot në sabah

Ndërsa këto janë fjalët e mia:

Ej, trima, jo për një manipulator gjysëm taleban e gjysëm mitoman, po për krejt botën sikur të ma falin, nuk e hedh një pikë balte unë mbi flamurin e UÇK-së

Dhe kush bën shaka me ndërhyrjen agresive të Iranit në këtë protestë, do ndihet shumë i turpëruar kur e vërteta të dalë në shesh, pasi e tërë kjo mjegull histerie digjitale të shpërndahet