Ish-drejtori i Parkut të Butrintit dhe studiuesi i trashëgimisë kulturore, Auron Tare, ka reaguar ashpër ndaj deklaratave të fundit të kryeministrit Edi Rama të bëra në podcast-in e tij. Pasi kreu i qeverisë la të kuptohej se qytetarët dhe ekspertët që protestojnë për zonat e mbrojtura rrezikojnë të bëhen “instrumente të interesave të fshehta”, Tare ka risjellë në vëmendje kontributin e tij mbi 30-vjeçar në shërbim të monumenteve dhe arkeologjisë shqiptare.

Përmes një artikulli me tone të forta ironizuese dhe kritike, Tare ka hedhur poshtë akuzat e kryeministrit për "agjenda të padukshme", duke renditur betejat e tij kombëtare dhe ndërkombëtare, që nga krijimi i Parkut Kombëtar të Butrintit e kërkimet nënujore, e deri te gjetja e provave historike për çështjen e Kanalit të Korfuzit. "Sipas logjikës së re politike, njeriu mund të kalojë një jetë duke mbrojtur pasurinë kombëtare dhe një mëngjes zbulon se paska qenë vegël e interesave të padukshme", shprehet Tare, duke kërkuar sqarime se kujt i paska shërbyer me këtë mund.

Kontrasti mes propagandës dhe betonit: Rasti i Përmetit Për të ilustruar atë që e quan hendek të madh mes "propagandës plot ngjyra të podcast-it" dhe realitetit në terren, Tare ka marrë si shembull një investim të fundit qeveritar në qytetin e Përmetit:

Ndërtimi në oborrin e shkollës: Tare denoncon ngritjen e një Qendre të re të Informacionit Turistik, një godinë e rëndë betoni e vendosur mu në oborrin e shkollës së mesme “Sami Frashëri”, duke u marrë fëmijëve hapësirën e argëtimit.

Cënimi i monumenteve natyrore: Objektet e reja janë ndërtuar vetëm pesë metra larg Gurit të Përmetit, që përbën simbolin natyror dhe zonën e mbrojtur të qytetit.

Godina pa funksion: Në epokën digjitale, kur çdo turist e gjen informacionin në celular, Përmeti po mbushet me qendra informacioni bosh që shërbejnë si "hije për gomerët e fshatit".

Në mbyllje të reagimit të tij, Auron Tare thekson se qytetarët, prindërit dhe banorët që ngrenë zërin kundër këtyre "idiotësive" nuk po binden nga forca të errëta, por po përballen me një realitet ku qytetari që pyet shihet gjithmonë si i dyshimtë, ndërsa ata që hedhin beton pa arsye shpallën patriotë. Sipas tij, është pikërisht ky realitet që ka detyruar rininë të mbushë bulevardet për të kërkuar ndryshimin.