Kryeministri Edi Rama ka thyer heshtjen pas javësh protestash të forta kundër korrupsionit, të lidhura me projektin miliardash të dhëndrit të Donald Trump, Jared Kushner. Në një intervistë për median prestigjoze Financial Times, kreu i qeverisë hodhi poshtë me tone mjaft të ashpra akuzat se udhëheq një sistem korruptiv në vend, duke refuzuar prerazi etiketimin si “Kumbari” i Shqipërisë.

“Njerëzit thonë se unë jam udhëheqësi i gjithë kësaj. Unë u them atyre f*ck you. Kaq e thjeshtë. Nuk është puna ime të provoj që nuk jam Kumbari, por e tyre të provojnë të kundërtën,” deklaroi Rama prerazi.

"Revolucioni i Flamingove" dhe investigimi i SPAK

Protestat, të cilat tashmë janë pagëzuar si “Revolucioni i Flamingove”, shpërthyen pas pakënaqësisë publike ndaj planit prej 4 miliardë dollarësh për ndërtimin e një resorti luksoz pranë një zone të mbrojtur natyrore. Projekti, i cili menaxhohet nga Jared Kushner dhe Ivanka Trump, ka ndezur debate të mëdha mbi ndikimin mjedisor.

Nga ana tjetër, situata është ndezur edhe më shumë pas lëshimit të mbi 20 urdhër-arresteve nga prokuroria e posaçme (SPAK) ndaj biznesmenëve të dyshuar për trafik droge dhe pastrim parash, miliarda euro të të cilëve dyshohet se janë investuar në sektorin e ndërtimit në Tiranë dhe përgjatë bregdetit Adriatik.

Mes emrave të përfshirë në hetime është edhe biznesmeni shqiptaro-amerikan Artur Shehu, i cili rezulton t’i ketë shitur tokë projektit të Kushnerit. Deri më tani, prokurorët kanë ngrirë një vlerë prej 128 milionë eurosh në pritje të zbardhjes së plotë të çështjes.

Rama: Akuzat për pastrim parash janë të tmerrshme

Pavarësisht hijeve të dyshimit dhe hetimeve të bujshme, kryeministri Rama mori në mbrojtje investimin dhe mohoi që flukset e parave të kenë origjinë kriminale.

Për pastrimin e parave: “Të thuash se ekonomia shqiptare bazohet në pastrim parash është e tmerrshme. Pastrimi i parave ekziston, por nuk është problemi kryesor i ekonomisë sonë.”

Për prapavijën e protestave: Rama pretendoi se lëvizjet qytetare dhe mediatike nxiten nga kundërshtarët politikë të presidentit të zgjedhur amerikan: “Nëse nuk do të ishte Jared Kushner, askush nuk do të interesohej për flamingot apo për Shqipërinë. E gjithë kjo lidhet me urrejtjen ndaj Trump.”

Në mbyllje të intervistës, kreu i ekzekutivit rikonfirmoi vendosmërinë e qeverisë për të mos u tërhequr nga planet aktuale të zhvillimit turistik, duke e cilësuar praninë e emrave të tillë në Shqipëri si një "shans historik" që nuk mund të humbitet.