Kombëtarja e Francës ka siguruar biletën për në raundin e 32-shes së Kupës së Botës 2026, pas një fitoreje të pastër 3-0 kundër Irakut në Grupin I. Ky sukses erdhi pas një sfide të jashtëzakonshme në Philadelphia, e cila zgjati plot katër orë për shkak të motit të keq.

Ndeshja nisi sipas parashikimit, me "Blutë" që zhbllokuan rezultatin në minutën e 14-të me anë të Kylian Mbappe. Mirëpo, pas përfundimit të pjesës së parë, stuhia e fortë e shiut dhe rrufetë detyruan organizatorët të ndërprisnin takimin për dy orë. Pas pritjes së gjatë dhe frikës për një pezullim të mundshëm, skuadrat u rikthyen në fushë për pjesën e dytë.

Në minutën e 54-t, Ousmane Dembele shërbeu mjaft mirë për Mbappe, i cili nuk gaboi dhe shënoi golin e dytë personal. Më vonë, ishte radha e Michael Olise për të asistuar Dembele, i cili me një goditje të saktë me të djathtën vulosi rezultatin përfundimtar në 3-0.

Kjo sfidë kishte një rëndësi të veçantë për Kylian Mbappe, i cili regjistroi ndeshjen e tij të 100-të me fanelën e Francës, duke e çuar numrin e golave totalë me kombëtaren në 60. Për më tepër, me dy golat e shënuar ndaj Irakut, Mbappe arriti në kuotën e 16 golave në historinë e Kupës së Botës, duke barazuar rekordin e legjendës gjermane Miroslav Klose dhe duke u pozicionuar vetëm dy gola pas Lionel Messit.

Me këtë triumf, Franca kryeson Grupin I me 6 pikë, e ndjekur nga Norvegjia po me 6 pikë, teksa të dyja kombëtaret kanë siguruar kalimin e mëtejshëm përpara ndeshjes direkte mes tyre.