Kreu i Grupit Parlamentar të Partisë Socialiste, Taulant Balla, ka reaguar pas leximit të kërkesave të protestuesve gjatë tubimit të zhvilluar përpara Kryeministrisë, të paraqitura nga ish-luftëtari i UÇK-së, Dritan Goxhaj.

Përmes një postimi në rrjetet sociale, Balla deklaroi se dalja e Goxhajt në emër të protestuesve “zbardh plotësisht skenarin” e protestave, duke e cilësuar atë si “zëdhënës të Republikës Islamike të Iranit në Shqipëri”.

Sipas tij, Goxhaj ka mbajtur prej kohësh qëndrime publike në mbështetje të regjimit iranian, si dhe ka kritikuar Shtetet e Bashkuara, Izraelin dhe Shqipërinë.

“Deklaratën me kërkesa në emër të protestuesve e mbajti ‘zëdhënësi’ i Republikës Islamike të Iranit në Shqipëri”, shkroi Balla, duke shtuar se është e papranueshme që një ish-pjesëtar i UÇK-së të mbrojë, sipas tij, interesa që bien ndesh me aleatët perëndimorë.

Në reagimin e tij, Balla theksoi gjithashtu rolin e Shteteve të Bashkuara në procesin e çlirimit të Kosovës, duke deklaruar se pa mbështetjen amerikane nuk do të ishte e mundur as liria dhe as pavarësia e saj.

Ai e mbylli reagimin me kritika ndaj organizatorëve dhe pjesëmarrësve në protestë, duke pretenduar se, sipas tij, po qartësohet gjithnjë e më shumë natyra dhe qëllimet e tubimeve.

Reagimi vjen menjëherë pas publikimit të platformës me kërkesat e protestës, ku përfshihen dorëheqja e kryeministrit, krijimi i një qeverie teknike dhe ndryshime të thella kushtetuese e ligjore.