Gjatë protestës së ditës së 23-të të zhvilluar në Tiranë, një qytetar ka mbajtur një fjalim nga sheshi përpara Kryeministrisë, ku i ka bërë thirrje Prokurorisë së Posaçme (SPAK) që të nisë hetime ndaj kryeministrit Edi Rama dhe personave përreth tij.

Në fjalën e tij, ai theksoi se në momentet kur qytetarët humbin besimin te institucionet, sipas tij, është detyrim qytetar kërkimi i llogarisë dhe reagimi publik.

“Ka momente në historinë e një kombi kur indiferenca është arma e atyre që e duan kombin të dorëzuar, por ky nuk është ai moment, sepse të gjithë shqiptarët janë bashkë kundër sistemit të korruptuar,” u shpreh ai.

Ai i bëri thirrje SPAK-ut të ushtrojë detyrën e tij, duke kërkuar hetimin e kryeministrit dhe rrethit të tij, ndërsa deklaroi se integrimi europian i Shqipërisë kërkon, sipas tij, largimin e atyre që “mbajnë peng të ardhmen e vendit”.

“Këtu nuk ka parti politike, jemi këtu për kombin. Rroftë Shqipëria dhe shqiptaria,” tha qytetari, duke shtuar se kryeministri duhet të japë dorëheqjen.