Qeveria gjermane ka reaguar lidhur me protestat e vazhdueshme që po zhvillohen në Tiranë, duke theksuar se ato përbëjnë një çështje të brendshme të Shqipërisë.

Në një deklaratë për Deutsche Welle, zëdhënësi i Ministrisë së Jashtme të Gjermanisë, Martin Giese, u pyet mbi qëndrimin e Berlinit ndaj protestave, si dhe mbi kontaktet e mundshme me protestuesit dhe pritshmëritë ndaj qeverisë shqiptare.

Giese u shpreh shkurtimisht se e drejta e protestës është një e drejtë themelore e qytetarëve, por theksoi se zhvillimet aktuale në Shqipëri nuk janë objekt ndërhyrjeje apo qëndrimi politik nga ana e Gjermanisë.

“Protestat janë një e drejtë e qytetarëve, por mbeten një çështje e brendshme politike e Shqipërisë”, deklaroi ai.

Qëndrimi i Berlinit vjen në një moment kur në vend po vijojnë tubime të shumta qytetare në lidhje me çështje të ndryshme politike dhe mjedisore, të cilat kanë tërhequr vëmendjen edhe të mediave ndërkombëtare.

Autoritetet gjermane nuk kanë dhënë detaje të mëtejshme mbi kontaktet e mundshme me palët e përfshira në protesta.