Një zyrtar i Operatorit të Shpërndarjes së Energjisë Elektrike (OSHEE) ka rënë në prangat e Policisë së Lezhës, pasi dyshohet se ishte në posedim të një automjeti të vjedhur.

Burime pranë grupit hetimor bëjnë me dije se i arrestuari është Ervin Kodra, përgjegjës i OSHEE-së për zonën e Mirditës.

Sipas informacioneve paraprake, Kodra është kapur nga efektivët e Policisë teksa po tentonte të nxirrte nga bregu i një lumi një automjet që rezultonte i denoncuar si i vjedhur në Korçë. Gjatë verifikimeve është konstatuar se mjeti qarkullonte me targa të mbivendosura, të cilat gjithashtu rezultonin të vjedhura në Elbasan.

Mësohet se Ervin Kodra ka deklaruar para hetuesve se automjeti i kishte ngecur në lumë, por nuk ka dhënë shpjegime bindëse se si mjeti i vjedhur dhe targat e vjedhura kishin përfunduar në posedimin e tij.

Burime hetimore bëjnë të ditur se pretendimet e tij janë hedhur poshtë nga provat e mbledhura deri tani, ndërsa hetimet vijojnë për të zbardhur plotësisht rrethanat e ngjarjes.

Autoritetet po verifikojnë gjithashtu nëse automjeti në fjalë është përdorur ose jo në ndonjë aktivitet kriminal, ndërsa ndaj të arrestuarit rëndojnë akuzat për veprat penale që lidhen me vjedhjen dhe posedimin e sendeve të vjedhura.