Përplasja e fortë ka shkaktuar vetëm dëme të mëdha materiale

Një aksident rrugor, i cili fatmirësisht u mbyll pa pasoja në njerëz, ka ndodhur paraditen e sotme në aksin rrugor Elbasan–Cërrik. Një automjet tip veturë është përplasur fort me një furgon që transportonte pasagjerë dhe menjëherë pas goditjes është përfshirë nga flakët e zjarrit.

Sipas të dhënave të para në vendngjarje, përplasja ka qenë mjaft e fuqishme, çka ka bërë që vetura të merrte zjarr në pjesën e motorrit, duke krijuar momente paniku të shumtë tek udhëtarët e furgonit dhe kalimtarët e rastit në atë aks.

Në vendin e ngjarjes kanë mbërritur me shpejtësi shërbimet zjarrfikëse, ambulanca dhe forcat e policisë. Efektivat kanë bërë të mundur izolimin dhe shuarjen e plotë të flakëve, si dhe kanë marrë masat e menjëhershme për menaxhimin e trafikut dhe normalizimin e qarkullimit të automjeteve.

Policia konfirmoi zyrtarisht se nga ky aksident nuk ka asnjë person të lënduar, ndërsa po punon për zbardhjen e shkaqeve të sakta të përplasjes.