Mbrëmjen e djeshme, studioja e “Top Arena” është përfshirë nga emocione të forta me praninë e dy këngëtarëve të njohur, Bubulina dhe Blondi Krasniqi. Dyshi performoi live projektin e tyre muzikor “Të Dua”, një këngë që mban një domethënie të veçantë për publikun, pasi përgjatë rrugëtimit në shtëpinë e “Big Brother VIP 5” u kthye në simbolin e historisë së dashurisë mes Mateo Borrit dhe Brikena Selmanit.

Të dy ish-banorët, të cilët tashmë janë pjesë e panelit të emisionit, mbetën të befasuar nga kjo surprizë. Gjatë performancës, Mateo nuk i fshehu emocionet dhe u pa gjatë gjithë kohës duke qeshur, ndërsa modelja Brikena Selmani zgjodhi të qëndronte disi më serioze.

Megjithatë, situata ka ndryshuar pas përfundimit të intervistave. Ish-finalisti i BBV5 shfrytëzoi rikthimin e dy artistëve në skenë për t’iu afruar Brikenës, duke e ftuar atë në një kërcim. Ndonëse fillimisht e rezervuar, modelja ka pranuar ftesën duke buzëqeshur.

Ky moment ka rindezur menjëherë interesin e ndjekësve, duke qenë se vetëm pak ditë më parë Brikena konfirmoi publikisht ndarjen nga Mateo pa dhënë detaje mbi arsyet. Ky afrim i papritur në studio ka bërë që fansat e dyshes të nisin aludimet nëse ky është hapi i parë drejt një ribashkimi të mundshëm.