Një grup i vogël protestuesish kanë kaluar natën përpara godinës së Kryeministrisë në Tiranë dhe ndodhen ende në vendngjarje edhe mëngjesin e së hënës, duke mbajtur të bllokuar qarkullimin në bulevardin “Dëshmorët e Kombit”.

Sipas raportimeve, protestuesit janë vendosur në hapësirën përpara godinës, ku disa prej tyre janë ulur në stola metalikë. Në shkallët e Kryeministrisë janë vendosur edhe këpucë, të cilat simbolizojnë emigrimin e qytetarëve.

Forca të policisë ndodhen në terren për të monitoruar situatën, ndërsa qarkullimi i automjeteve në zonë vijon të mbetet i ndërprerë.

Prania e protestuesve vijon që nga mbrëmja e së shtunës, duke u shtrirë përgjatë gjithë ditës së diel dhe duke hyrë në mëngjesin e sotëm.