Kryeministri Edi Rama ka reaguar në rrjetet sociale pas përfundimit të protestës së 22-të para Kryeministrisë, duke ndarë pamje nga situata në terren pas mesnate.

Sipas pamjeve të publikuara, në shesh kanë mbetur mbetje plastike, letra dhe një simbol flamingoje i hedhur në tokë, ndërsa më pas shërbimet e pastrimit kanë ndërhyrë për mirëmbajtjen e zonës.

Në reagimin e tij, Rama thekson kontrastin mes qëllimit fillestar të protestës, e cila sipas tij nisi për mbrojtjen e mjedisit, por përfundoi me ndotje të hapësirës publike. Ai e cilësoi këtë si një “metaforë të përfundimit të protestës”.

Autoritetet nuk kanë dhënë ende një vlerësim zyrtar mbi pjesëmarrjen apo incidentet e mundshme gjatë protestës.