Shtetet e Bashkuara pritet të vazhdojnë zbatimin e rregullave të veçanta të udhëtimit për përfaqësuesen e Iranit në Kupën e Botës, pavarësisht pakënaqësive të shprehura nga federata iraniane dhe një ankese të paralajmëruar në FIFA.

Sipas këtyre masave, delegacioni iranian lejohet të udhëtojë drejt qytetit ku zhvillohet ndeshja vetëm 24 orë para sfidës dhe duhet të rikthehet menjëherë në bazën stërvitore në Tijuana, Meksikë, pas përfundimit të takimeve.

Trajneri Amir Ghalenoei ka kritikuar këto kushte, duke deklaruar se ekipi i tij po përballet me vështirësi në procesin e rikuperimit dhe duke e cilësuar përfaqësuesen si “ekipin më të shtypur në Kupën e Botës”.

Pas ndeshjes së parë ndaj Zelandës së Re, skuadra është kthyer në Tijuana vetëm pak orë pas përfundimit të lojës, pa qëndrim gjatë natës në qytetin ku u zhvillua takimi, gjë që sipas stafit teknik ka ndikuar në rikuperimin e lojtarëve.

Ndërkohë, është raportuar edhe një problem i përkohshëm me vizat për disa lojtarë, përfshirë sulmuesin Mehdi Taremi, çështje që më pas është zgjidhur nga autoritetet amerikane përmes dhënies së vizave shumë-hyrëse.

Autoritetet amerikane kanë mbrojtur masat e vendosura, duke deklaruar se ato janë pjesë e protokolleve të sigurisë dhe organizimit të turneut, me qëllim garantimin e një aktiviteti të sigurt dhe të mirëmenaxhuar.