Një zjarr është raportuar në anë të rrugës nacionale Gjirokastër–Tepelenë, pranë fshatit Humelicë, duke rrezikuar banesa dhe një park bletësh në zonë.

Sipas Drejtorisë së Mbrojtjes nga Zjarri dhe Shpëtimi në Gjirokastër, pas njoftimit, në vendngjarje është nisur menjëherë grupi i patrullimit dhe forcat zjarrfikëse.

Në terren është konstatuar se flakët po përhapeshin me shpejtësi, duke vënë në rrezik pronat e banorëve të zonës. Ndërhyrja e shpejtë e forcave të MZSh-së ka bërë të mundur izolimin dhe shuarjen e plotë të zjarrit.

Si pasojë e ndërhyrjes në kohë, nuk janë raportuar dëme në njerëz apo në banesa.

Autoritetet bëjnë me dije se ndaj pronarit të parcelës ku dyshohet se ka nisur zjarri do të merren masat administrative përkatëse, në përputhje me legjislacionin në fuqi.