Një qytetar i moshuar nga rrethinat e Vlorës ka marrë pjesë në protestën e zhvilluar në Tiranë, duke shprehur pakënaqësinë e tij ndaj situatës politike në vend.

Duke folur për mediat, ai tha se ka qenë disa herë i pranishëm në tubime, ndërsa theksoi se, sipas tij, kriza aktuale kërkon ndërhyrjen e institucioneve të drejtësisë ndaj drejtuesve kryesorë politikë.

“Unë nuk jam as politikan e as orator. Nuk njoh as Sali Berishën as Edi Ramën, por mendoj se duhet të ndërhyjë drejtësia për të zgjidhur problemet e këtij populli”, u shpreh ai.

Qytetari deklaroi gjithashtu se ka votuar më parë për kryeministrin Edi Rama, por se, sipas tij, kjo “kontratë është prishur”, pasi ai nuk ndjehet më i përfaqësuar.

“Rama thotë se e kanë votuar 800 mijë shqiptarë; unë ia kam dhënë votën, por e kam prishur kontratën me të, sepse nuk na përgjigjet më si popull”, shtoi ai.