Kryeministri i Shqipërisë, Edi Rama, ka reaguar lidhur me debatet politike ku, sipas tij, përfshihen shqiptarë nga Kosova dhe Maqedonia e Veriut në zhvillimet e brendshme politike në Shqipëri.

Në një postim publik, Rama thekson se shqiptarët e Maqedonisë së Veriut nuk duhet të konsiderohen diasporë e Shqipërisë, por një komunitet shtetformues në shtetin ku jetojnë. Ndërsa për shqiptarët e Kosovës, ai nënvizon se ata nuk mund të trajtohen si diasporë, pasi Kosova është shtet i pavarur.

Kryeministri kritikon përdorimin e këtyre komuniteteve në debate politike në Tiranë, duke thënë se një qasje e tillë dëmton imazhin e tyre dhe krijon keqkuptime publike.

Rama është shprehur gjithashtu kundër përdorimit të flamurit të UÇK-së në protesta me karakter politik në Shqipëri, duke e konsideruar të papërshtatshëm përplasjen e simboleve historike me qëllime politike të brendshme.

Ai i është referuar edhe kryeministrit të Kosovës, Albin Kurti, duke kërkuar që të mos përfshihet në këtë debat, ndërsa thekson se nuk e konsideron atë përgjegjës për veprimet e individëve apo grupeve të caktuara.