SHBA, 21 qershor 2026 – Trajneri i Uruguajit, Marcelo Bielsa, ka kritikuar vendimin e FIFA-s për të aplikuar pushime të detyrueshme për hidratim gjatë ndeshjeve të Kupës së Botës 2026, duke argumentuar se masa po ndikon negativisht në rrjedhën dhe natyrën e lojës.

Gjatë një deklarate për mediat, tekniku argjentinas u shpreh se ndarja e ndeshjeve në katër periudha për shkak të pushimeve të hidratimit ndryshon konceptin tradicional të futbollit.

“Të luash katër periudha në vend të dy ndryshon vetë konceptin e futbollit”, deklaroi Bielsa.

Pushimet për ujë janë vendosur nga FIFA për të mbrojtur lojtarët nga temperaturat e larta dhe kushtet e vështira klimatike gjatë turneut, duke u dhënë atyre disa minuta për rikuperim dhe hidratim.

Megjithatë, Bielsa argumenton se këto ndërprerje nuk sjellin përfitime për lojën. Sipas tij, ato “nuk shtojnë asgjë dhe heqin shumë” nga dinamika dhe ritmi i futbollit.

Trajneri uruguaian la të kuptohet gjithashtu se ndërprerjet krijojnë hapësira shtesë për transmetimet televizive dhe reklamat, duke sugjeruar se ndikimi i tyre shkon përtej aspektit sportiv.

“Nuk menduam për pasojat që kjo mund të kishte në sport, por për një lloj tjetër pasojash”, tha ai, duke iu referuar indirekt interesave komerciale që lidhen me transmetimin e ndeshjeve.

Pavarësisht kritikave ndaj organizimit të turneut, Bielsa shmangu komentet e gjata për ndeshjen e ardhshme të Uruguajit kundër Kepit të Gjelbër, duke u fokusuar kryesisht te ndikimi që, sipas tij, këto ndryshime po kanë në futbollin modern.

Uruguaji synon të përmirësojë paraqitjen pas barazimit 1-1 ndaj Arabisë Saudite, ndërsa përballet me një nga surprizat e këtij Botërori, Kombëtaren e Kepit të Gjelbër.