Policia e cilëson kriminel me rrezikshmëri të lartë, por gjykata i ka dhënë vetëm 4 vjet burg 34 vjeçarit Vis Korçari i cili më herët sot gjatë natës u kap në Ksamil, pasi dikush dha sinjale për vendndodhjen e tij dhe një agjent policor u infiltrua për ta shtënë në dorë.

Policia e qarkut Vlorë tha sot se për kapjen e Elvis Koçit (Çaushllari), i njohur dhe si Vis Korçari, u krye një operacion special nga Komisariati i Policisë Sarandë, në bashkëpunim me Drejtorinë e Forcës së Posaçme Operacionale në Policinë e Shtetit.

Noa.al raporton se policia kishte siguruar informacione të besueshme dhe me përdorimin e metodave speciale të hetimit, bëri të mundur lokalizimin në qendër të Ksamilit, të të kërkuarit 34 vjeçar.

"Elvis Koçi 34 vjeçar, banues në Elbasan, u kap në një automjet tip "Audi", tha policia e cila shtoi se ai është i dyshuar si anëtar i një grupi kriminal me rrezikshmëri të lartë në qytetin e Elbasanit.

Në momentin e ndërhyrjes, i riu ka tentuar të largohet, por është neutralizuar dhe arrestuar nga shërbimet e Policisë.

Elvis Koçi ishte shpallur në kërkim, pasi Gjykata e Posaçme e Apelit për Korrupsionin dhe Krimin e Organizuar ka lënë në fuqi vendimin e Gjykatës së Posaçme të Shkallës së Parë për Korrupsionin dhe Krimin e Organizuar, e cila e ka dënuar me 4 vjet burgim për veprat penale "Grup i strukturuar kriminal" dhe "Sigurimi i kushteve dhe mjeteve materiale për të kryer vrasje", ndërsa atij i kanë mbetur për të vuajtur 2 vjet, 9 muaj dhe 9 ditë burgim.

Materialet procedurale iu referuan Prokurorisë, për veprime të mëtejshme.