MYNIH – Një aksident hekurudhor ka ndodhur gjatë natës në qytetin e Mynihut, ku dy trena mallrash janë përplasur, duke shkaktuar daljen nga shinat të njërit prej tyre dhe rënien e disa vagonëve nga një urë.

Sipas autoriteteve lokale, si pasojë e ngjarjes ka humbur jetën një person. Dy vagonë janë rrëzuar nga ura hekurudhore pas përplasjes, ndërsa dëmet materiale janë të konsiderueshme.

Një zëdhënëse e policisë në vendngjarje konfirmoi se incidenti ka ndodhur gjatë operimit të trenave të mallrave. Shkaku i përplasjes ende nuk është bërë i ditur dhe po hetohet nga autoritetet përkatëse.

Pas aksidentit, ekipet e emergjencës kanë nisur operacionet për largimin e vagonëve dhe normalizimin e situatës. Zona e prekur në lagjen Milbertshofen mbetet e mbyllur dhe pritet të jetë e papërdorshme edhe gjatë ditës së nesërme.

Autoritetet gjermane theksojnë se nuk ka rrezik për publikun, ndërsa hetimet për rrethanat e aksidentit vijojnë.