“Edi Rama, je i rrethuar, jep dorëheqjen”/ Protestuesit marshojnë rreth Kryeministrisë dhe publikojnë 5 kërkesat

Pas përfundimit të fjalimeve në protestën e zhvilluar në Tiranë, qindra qytetarë kanë nisur një marshim rreth godinës së Kryeministrisë, duke intensifikuar thirrjet kundër qeverisë dhe kryeministrit Edi Rama.

Gjatë marshimit, protestuesit deklaruan se godina e Kryeministrisë ishte simbolikisht e rrethuar dhe i kërkuan kreut të qeverisë të japë dorëheqjen.

“Kryeministria është rrethuar. Në këtë moment i themi kryeministrit: je i rrethuar. Jep dorëheqjen”, u shprehën organizatorët dhe pjesëmarrësit gjatë protestës.

Paralelisht me marshimin, protestuesit bënë publike edhe pesë kërkesat kryesore që, sipas tyre, duhet të plotësohen nga qeveria.

Në krye të tyre qëndron dorëheqja e kryeministrit Edi Rama, ndërsa kërkohet gjithashtu krijimi i një qeverie teknike.

Një tjetër kërkesë është shfuqizimi i Ligjit për Zonat e Mbrojtura, të cilin protestuesit e kundërshtojnë për ndikimin që sipas tyre mund të ketë mbi mjedisin dhe pasuritë natyrore.

Po ashtu, ata kërkojnë shfuqizimin e Ligjit për Investimet Strategjike, si dhe anulimin e plotë të projektit të njohur si “Paketa e Maleve”.

Organizatorët deklaruan se protesta do të vazhdojë deri në realizimin e kërkesave të tyre, ndërsa pjesëmarrësit vijuan marshimin dhe thirrjet para godinës së Kryeministrisë.

Situata deri tani paraqitet e qetë dhe nën monitorimin e forcave të policisë, ndërsa protesta po vijon në qendër të kryeqytetit.