TIRANË – Deputetja e Partisë Socialiste, Briseida Çakërri, ka komentuar protestën e zhvilluar në Tiranë, duke deklaruar se ajo nuk përfaqëson më një lëvizje qytetare, por është shndërruar në një tubim politik.

E ftuar në një emision televiziv, Çakërri u shpreh se në protestë janë përfshirë përfaqësues të partive të ndryshme politike, të cilët sipas saj po e përdorin situatën për qëllime elektorale.

“Grupet politike aty kanë dalë hapur, qoftë nga partia Mundësia, Arlindi, Adriatiku, Euroatlantiku, PD-ja, të gjithë janë aty për të rritur numrin e tyre të votuesve,” deklaroi ajo.

Sipas deputetes socialiste, protesta ka humbur karakterin qytetar dhe është bërë e fragmentarizuar politikisht, duke e krahasuar atë në mënyrë figurative me një “turli”.

“Kjo protestë s’është më qytetare, është politike. Do ta them në mënyrën më popullore të mundshme: i ngjan një turlie ku janë partitë e vogla, me bamje, speca, patëllxhan e të gjitha, por s’ka mish, s’ka kokë, dhe do të thotë që s’do dalë asgjëkundi për sa kohë hynë partitë e vogla,” u shpreh Çakërri.

Deklaratat e saj vijnë në një kohë kur protestat në kryeqytet kanë hyrë në ditën e 21-të, me pjesëmarrje të shtuar nga qytetarë dhe përfaqësues të diasporës.