TIRANË – Deputetja Marjana Koçeku, e njohur si “Neomalësorja”, është parë këtë të shtunë mes protestuesve në Tiranë, në ditën e 21-të të tubimit qytetar para godinës së Kryeministrisë.

Prania e saj në protestë vjen pak ditë pas largimit nga grupi parlamentar i Partisë Socialiste, ndërsa Koçeku është shfaqur mes qytetarëve që kërkojnë dorëheqjen e kryeministrit Edi Rama dhe krijimin e një qeverie teknike që do të çonte vendin drejt zgjedhjeve të reja.

E pyetur nga gazetarët mbi arsyet e pjesëmarrjes së saj në protestë dhe zhvillimet e fundit politike, deputetja ka zgjedhur të mos japë një deklaratë të plotë.

“E kam mendjen te protesta. Ta lëmë vëmendjen te protesta. Do të prononcohem në një moment tjetër”, u shpreh shkurt Koçeku.

Ndërkohë, protesta para Kryeministrisë ka hyrë në ditën e saj të 21-të dhe këtë fundjavë është karakterizuar nga pjesëmarrje e shtuar e qytetarëve dhe e shqiptarëve të ardhur nga diaspora, të cilët vijojnë të shprehin kërkesat e tyre për ndryshime politike dhe institucionale në vend.