TIRANË – Ministri i Drejtësisë, Ulsi Manja, ka reaguar përmes një postimi në rrjetet sociale lidhur me pjesëmarrjen e diasporës në protestën e zhvilluar në Tiranë, duke ironizuar disa prej protestuesve që, sipas tij, kanë mbërritur me automjete luksoze.

Në reagimin e tij, Manja ngriti pikëpyetje mbi motivet e protestës, duke sugjeruar se pjesëmarrja e qytetarëve me mjete të shtrenjta bie ndesh me pretendimet për një protestë të lidhur me vështirësi ekonomike.

“Edhe këta me makina të shtrenjta me siguri për bukën e gojës protestojnë!? Çfarë shpërdorimi i lirisë. Patriotë me flamuj shqiptarë në makina të shtrenjta, që vijnë nga diaspora për të mbështetur kauza sociale, të atyre që kanë dalë për bukën e gojës. Madje, këta me makina të shtrenjta qenkan edhe më ambientalistë se këta të flamingove! Çfarë paradoksi! Hajde protestë, hajde”, shkroi ai.

Deklarata e ministrit ka ngjallur reagime dhe diskutime në rrjetet sociale, ndërsa protestuesit në Tiranë vijojnë tubimin e tyre, duke kërkuar ndryshime politike dhe institucionale në vend.

Nga ana tjetër, pjesëmarrësit në protestë kanë theksuar se motivet e tyre lidhen me kërkesa politike dhe jo vetëm me çështje ekonomike.