TIRANË – Deputetja Marjana Koçeku iu bashkua këtë të shtunë protestës së zhvilluar në Tiranë, në ditën e 21-të të mobilizimit qytetar që po mbahet në kryeqytet.

Prania e saj në tubim vjen pak ditë pasi ajo njoftoi largimin nga grupi parlamentar i Partisë Socialiste. Koçeku u pa mes protestuesve, të cilët u mblodhën fillimisht në sheshin “Skënderbej” dhe më pas marshuan drejt Kryeministrisë.

Më herët gjatë javës, deputetja bëri të ditur përmes një postimi në rrjetet sociale se do t’i bashkohej protestës qytetare në Tiranë. Në publikimin e saj, ajo ndau një imazh të flamingos, simbol që është përdorur gjerësisht nga pjesëmarrësit në protestë.

Në tubim morën pjesë qytetarë, aktivistë dhe shqiptarë të ardhur nga diaspora, të cilët shprehën qëndrimet e tyre përmes pankartave, flamujve kombëtarë dhe thirrjeve publike.

Gjatë protestës u përsëritën kërkesat për dorëheqjen e kryeministrit Edi Rama, ndërsa pjesëmarrësit artikuluan edhe slogane kundër figurave kryesore të politikës shqiptare.

Pjesëmarrja e Koçekut në protestë shihet si zhvillimi më i fundit politik pas vendimit të saj për t’u larguar nga grupi parlamentar i Partisë Socialiste.