TIRANË – Kreu i Grupit Parlamentar të Partisë Socialiste, Taulant Balla, ka reaguar pas pjesëmarrjes së protestuesve të ardhur nga diaspora në protestën e zhvilluar në Tiranë.

Përmes një reagimi publik, Balla deklaroi se prania e qindra automjeteve në kryeqytet nuk mund të konsiderohet si përfaqësuese e vullnetit të shqiptarëve që jetojnë jashtë vendit.

Sipas tij, qëndrimi i diasporës është shprehur përmes votës në zgjedhjet e një viti më parë, ku, siç theksoi ai, shumica e shqiptarëve jashtë vendit i dhanë mbështetje qeverisë së drejtuar nga kryeministri Edi Rama.

“Nuk e përfaqësojnë vullnetin e diasporës sonë kuqezi 100 apo 200 makina. Diaspora foli me votë një vit më parë. Dy ndër tre shqiptarë jashtë vendit i kanë besuar Edi Ramës mandatin e anëtarësimit të Shqipërisë në Bashkimin Evropian”, shkroi Balla.

Reagimi i zyrtarit socialist vjen në një kohë kur protestës së organizuar në Tiranë i janë bashkuar edhe shqiptarë të ardhur nga vende të ndryshme të botës, të cilët kanë shprehur mbështetjen e tyre për kërkesat e ngritura nga protestuesit.