TIRANË – Mijëra qytetarë u mblodhën këtë të shtunë në sheshin “Skënderbej”, në kuadër të protestës së 21-të radhazi që kërkon largimin e kryeministrit Edi Rama. Protestës iu bashkuan edhe shqiptarë të ardhur nga diaspora, duke e kthyer tubimin në një manifestim me përmasa kombëtare.

Pas grumbullimit në qendër të kryeqytetit, protestuesit nisën marshimin drejt godinës së Kryeministrisë. Me pankarta, flamuj kombëtarë dhe thirrje të artikuluara përmes megafonëve, pjesëmarrësit shprehën pakënaqësitë e tyre ndaj qeverisë dhe kërkuan ndryshime në drejtimin politik të vendit.

Gjatë protestës u dëgjuan thirrje si kundër qeverisë, ashtu edhe ndaj klasës politike në tërësi. Një pjesë e protestuesve brohoritën slogane që kërkonin përgjegjësi politike dhe ligjore për figurat kryesore të politikës shqiptare.

Pjesëmarrja e diasporës ishte një nga elementet më të spikatura të kësaj proteste. Shqiptarë të ardhur nga vende të ndryshme iu bashkuan tubimit në sheshin “Skënderbej”, ndërsa disa prej tyre u panë duke lëvizur me automjete në akset kryesore të Tiranës, të shoqëruara me flamuj kuqezi.

Organizatorët e konsideruan protestën një shprehje të pakënaqësisë qytetare ndaj qeverisjes aktuale, ndërsa pjesëmarrësit theksuan nevojën për ndryshime të thella politike dhe institucionale në vend.