TIRANË – Kryeministri dhe njëherazi kryetari i Partisë Socialiste, Edi Rama, komentoi zhvillimet e fundit brenda forcës politike që drejton, duke deklaruar se largimet individuale nuk duhet të konsiderohen të pazakonta në një rrugëtim politik që, sipas tij, mbetet sfidues.

Gjatë mbledhjes së Grupit Parlamentar të Partisë Socialiste, Rama tha se misioni i kësaj force politike nuk është të jetë e pëlqyer nga të gjithë, por të jetë e dobishme për vendin. Ai shtoi se nuk duhet të ketë habi nëse në të ardhmen individë të tjerë zgjedhin të largohen nga rruga politike e partisë.

“Mos u çudisni që në këtë rrugë do na dalin shumë të tjerë anash, mbrapa apo përballë. Kjo është rruga më e vështirë dhe është rruga jonë”, deklaroi Rama.

Komentet e kryeministrit vijnë pas largimit të deputetes Marjan Koçeku nga grupi parlamentar socialist, duke vijuar mandatin e saj si deputete e pavarur.

Në fjalën e tij, Rama u ndal edhe te ndikimi i rrjeteve sociale dhe platformave digjitale në debatin publik, duke pretenduar se në hapësirën online veprojnë aktorë të ndryshëm që synojnë të ndikojnë opinionin publik.

Sipas kreut të qeverisë, Partia Socialiste nuk do të intimidohet nga kritikat apo presionet që vijnë përmes këtyre kanaleve dhe do të vazhdojë të ndjekë objektivat e saj politike.

Deklaratat e Ramës u bënë në kuadër të diskutimeve të brendshme të grupit parlamentar socialist, në një periudhë të karakterizuar nga debat i shtuar politik dhe zhvillime të reja në skenën parlamentare.