TIRANË – Pikat e kalimit kufitar në Shqipëri do të funksionojnë me një sistem të ri sinjalistike dhe orientimi, pas miratimit të një vendimi nga Këshilli i Ministrave që përcakton standardet e reja për tabelat dhe simbolet informative në të gjithë territorin kufitar të vendit.

Vendimi është pjesë e zbatimit të kuadrit të ri ligjor për kontrollin e kufirit shtetëror dhe synon krijimin e një sistemi të unifikuar informacioni për udhëtarët, me qëllim lehtësimin e lëvizjes dhe rritjen e qartësisë së procedurave të hyrjes dhe daljes nga Shqipëria.

Sipas rregullave të reja, tabelat orientuese do të vendosen në gjuhën shqipe dhe angleze, duke mundësuar informim më të qartë edhe për shtetasit e huaj. Sinjalistika do të përdoret në aeroporte, porte detare dhe në akset rrugore që çojnë drejt pikave të kalimit kufitar tokësor.

Vendimi parashikon identifikimin e qartë të zonave ku kryhen kontrollet kufitare, si dhe vendosjen e tabelave standarde identifikuese në çdo pikë kalimi. Në rastet kur pikat kufitare funksionojnë me orar të kufizuar, do të afishohen edhe oraret zyrtare të shërbimit.

Një tjetër risi lidhet me organizimin e korsive të kalimit. Autoritetet do të krijojnë korridore të dedikuara për kategori të ndryshme udhëtarësh dhe mjetesh, me synimin për të përmirësuar menaxhimin e fluksit dhe për të reduktuar vonesat, veçanërisht gjatë periudhave me lëvizje intensive.

Në aeroportet ndërkombëtare dhe portet detare do të shënohen qartë edhe zonat e tranzitit, ndërsa hyrja dhe dalja nga territori i Republikës së Shqipërisë do të identifikohet përmes tabelave standarde të unifikuara.

Vendimi u jep gjithashtu mundësi autoriteteve të krijojnë korsi të veçanta për autovetura, autobusë dhe mjete të transportit të mallrave, në varësi të nevojave operacionale të secilës pikë kufitare.

Me hyrjen në fuqi të këtij akti, shfuqizohet vendimi i mëparshëm i vitit 2016. Zbatimi i standardeve të reja do të realizohet nga operatorët e aeroporteve, autoritetet portuale, Autoriteti Rrugor Shqiptar dhe institucionet e tjera përgjegjëse.

Sipas autoriteteve, ndryshimet pritet të përmirësojnë orientimin e udhëtarëve, të rrisin sigurinë në pikat kufitare dhe të harmonizojnë praktikat shqiptare me standardet moderne të menaxhimit të kufijve.