SHKODËR – Një autokolonë me pjesëmarrës nga diaspora shqiptare ka mbërritur në Shkodër gjatë rrugëtimit drejt Tiranës, ku pritet të zhvillohet një protestë qytetare në mbrëmje.

Dhjetëra automjete të stolisura me flamuj kombëtarë u ndalën për pak minuta në hyrje të qytetit, përpara se të vijonin udhëtimin drejt kryeqytetit. Pjesëmarrësit thanë se kanë ardhur nga vende të ndryshme të Europës për të marrë pjesë në protestë dhe për të shprehur mbështetjen e tyre ndaj kërkesave të protestuesve.

Një prej qytetarëve pjesëmarrës në autokolonë deklaroi se prania e diasporës synon të mbështesë të rinjtë dhe qytetarët e angazhuar në protestat e fundit në Tiranë, si dhe të përcjellë mesazhe politike lidhur me zhvillimet në vend.

Sipas tij, pjesëmarrësit kërkojnë një sistem përfaqësimi që, sipas tyre, garanton një rol më të madh të qytetarëve në zgjedhjen e institucioneve përfaqësuese. Ai gjithashtu përmendi kërkesat për krijimin e një qeverie teknike dhe mbajtjen e zgjedhjeve të parakohshme.

Autokolona pritet t’i bashkohet protestës së paralajmëruar në Tiranë, ku organizatorët kanë njoftuar pjesëmarrjen e qytetarëve nga zona të ndryshme të vendit dhe nga diaspora shqiptare.