DURRËS – Policia e Durrësit ka vënë në pranga dy persona të dyshuar për përfshirje në ngjarje të ndryshme kriminale, që lidhen me vjedhje me dhunë dhe tentativa vjedhjeje me armë.

Sipas njoftimit zyrtar, është arrestuar shtetasi M. F., 21 vjeç, banues në fshatin Mafsheq. Ai dyshohet se në orët e para të mëngjesit të datës 19 qershor 2026, i maskuar dhe i armatosur me armë automatike, ka hyrë në oborrin e banesës së një shtetaseje në fshatin Radë me qëllim vjedhjeje.

Në një rast tjetër, policia arrestoi shtetasin R. K., 51 vjeç, banues në Tiranë. Sipas hetimeve, ai dyshohet se në bashkëpunim me shtetasin T. M., i arrestuar më herët në kuadër të operacionit policor “Taksimetri”, ka kryer dy vjedhje me dhunë ndaj pasagjerëve që udhëtonin me automjete taksi në zonat e Shënvlashit dhe Rinasit.

Hetimet dhe analizimi i pamjeve filmike kanë dokumentuar, sipas policisë, rolin e R. K. si transportues i autorit të dyshuar, ndërsa T. M. dyshohet se realizonte vjedhjet ndaj drejtuesve të taksive në qytete të ndryshme, përfshirë Tiranën, Krujën dhe Durrësin.

Gjatë kontrollit të ushtruar në banesën dhe garazhin e R. K., uniformat blu sekuestruan prova materiale që dyshohet se e lidhin atë me veprimtarinë kriminale.

Materialet procedurale i janë referuar Prokurorisë kompetente për vijimin e hetimeve dhe kryerjen e veprimeve të mëtejshme ligjore.