TIRANË – Kryetari i Partisë Demokratike, Sali Berisha, deklaroi se mijëra qytetarë nga Shqipëria dhe diaspora po udhëtojnë drejt Tiranës për të marrë pjesë në protestën e organizuar nga opozita.

Gjatë një bashkëbisedimi me qytetarët në rrjetet sociale, Berisha e cilësoi pjesëmarrjen si një mobilizim të gjerë dhe falënderoi të gjithë ata që, sipas tij, kanë lënë angazhimet e tyre për t’iu bashkuar tubimit.

“Ka një vërshim të jashtëzakonshëm drejt Tiranës. Falënderoj të gjithë shqiptarët që po vijnë nga të katër anët e Shqipërisë dhe nga diaspora për të marrë pjesë në këtë protestë”, u shpreh ai.

Lideri demokrat theksoi se Partia Demokratike është e përqendruar në garantimin e një procesi të lirë zgjedhor dhe se e ardhmja politike e vendit duhet të përcaktohet nga vullneti i qytetarëve.

“Partia Demokratike ka vizionin dhe potencialet e nevojshme dhe do të bëjë çdo përpjekje që shqiptarët të votojnë të lirë. Do të jetë vota e lirë e qytetarëve ajo që do të përcaktojë qeverinë e ardhshme të vendit”, deklaroi Berisha.

Deklaratat e kreut të opozitës vijnë në prag të protestës së thirrur nga Partia Demokratike, e cila sipas organizatorëve synon të adresojë shqetësimet mbi situatën politike dhe institucionale në vend.