TIRANË – Kryeministri Edi Rama deklaroi se qeveria nuk mund të drejtohet nga presioni i turmave apo nga reagimet e momentit, duke theksuar se destinacioni i saj politik nuk ndryshon nga “zhurma” e protestave.

Gjatë mbledhjes së grupit parlamentar të Partisë Socialiste, Rama u shpreh se nuk e pranon që Tirana të kthehet në një “tur sfilate” për grupe që, sipas tij, bllokojnë institucione apo infrastrukturë të rëndësishme, si aeroporti.

“Kjo qeveri nuk e dorëzon kurrë timonin te zhurma. Një grup udhëheqës duhet të dëgjojë kritikat dhe shqetësimet e qytetarëve, por nuk mund të ndryshojë drejtimin sa herë që fryn era”, tha ai.

Kryeministri përdori edhe një referencë nga mitologjia greke, duke sjellë shembullin e Odiseut përballë sirenave. Sipas tij, ashtu si Odiseu u lidh pas anijes për të mos devijuar nga rruga, edhe një qeveri duhet të mbetet e fokusuar te objektivat e saj strategjikë.

“Një qeveri duhet të dëgjojë gjithçka që thuhet, por nuk mund t’i dorëzojë drejtimin e saj zhurmës. Sa më shumë të rritet zhurma, aq më shumë një grup udhëheqës duhet të forcojë identitetin dhe vendosmërinë e tij”, deklaroi Rama.

Në përfundim, kreu i qeverisë theksoi se një “mision historik” nuk mund të realizohet nëse drejtimi politik ndryshon vazhdimisht sipas rrethanave apo presioneve të momentit.