Lëkundje tërmeti janë regjistruar pasditen e së premtes në Shqipëri, rreth orës 18:26, me epiqendër pranë qytetit të Gjirokastrës.

Sipas të dhënave të Qendrës Sizmologjike Euro-Mesdhetare (EMSC), tërmeti ka pasur një magnitudë 3.6 ballë të shkallës Rihter, ndërsa thellësia e tij është regjistruar rreth 5 kilometra.

Për shkak të kësaj thellësie të vogël, lëkundjet janë ndjerë në mënyrë më të fortë në disa zona të jugut të vendit. Megjithatë, autoritetet raportojnë se deri më tani nuk ka informacione për dëme materiale apo persona të lënduar.

Ekspertët theksojnë se tërmete të kësaj magnitude konsiderohen të zakonshme dhe nuk përbëjnë rrezik për situata emergjente, megjithëse mund të ndihen nga popullsia në zonat pranë epiqendrës.

Sipas sizmiologëve, aktiviteti i tillë sizmik është pjesë e proceseve normale gjeologjike dhe ndihmon në çlirimin gradual të energjisë së akumuluar në koren e Tokës.