Radhë të gjata automjetesh janë krijuar në pikën e kalimit kufitar Krystallopigi, në anën greke të kufirit me Kapshticën, ku kolona e mjeteve ka kaluar dy kilometra dhe udhëtarët janë detyruar të presin për më shumë se një orë për të përfunduar procedurat e kalimit.

Sipas udhëtarëve, situata është shkaktuar nga reduktimi i sporteleve të punës nga ana e policisë kufitare greke, si dhe nga zbatimi i procedurave të reja të kontrollit, të cilat përfshijnë marrjen e shenjave të gishtërinjve dhe fotografimin e fytyrës së çdo udhëtari.

Këto procedura kanë rritur ndjeshëm kohën e përpunimit në kufi, duke krijuar vonesa të konsiderueshme dhe trafik të rënduar në të dy anët e kalimit kufitar.

Problematika, sipas qytetarëve, është vërejtur që në fazat e para të implementimit të sistemit të ri dhe vijon të ndikojë në qarkullimin e lirë të udhëtarëve mes Shqipërisë dhe Greqisë.

Situata bëhet veçanërisht shqetësuese në prag të sezonit turistik veror, kur pritet rritje e ndjeshme e fluksit të lëvizjeve ndërkufitare.

Qytetarët kërkojnë shtim të sporteleve dhe masa për përshpejtimin e procedurave, me qëllim shmangien e pritjeve të gjata dhe lehtësimin e kalimit në pikën kufitare.