Debati mbi politikat e emigracionit ka shkaktuar përplasje të reja mes liderëve evropianë gjatë mbledhjes së fundit të Këshillit Europian, ku kryeministrja italiane Giorgia Meloni dhe kryeministri spanjoll Pedro Sánchez u pozicionuan në qëndrime të kundërta.

Diskutimi u hap pas ndërhyrjes së kryeministres daneze Mette Frederiksen, e cila përshëndeti votimin e Parlamentit Evropian mbi rregulloren e re për kthimin e emigrantëve dhe kërkoi një debat strategjik në nivel europian për menaxhimin e migracionit.

Megjithatë, kryeministri spanjoll Pedro Sánchez shprehu kundërshtimin e tij ndaj kësaj qasjeje, duke argumentuar se nuk ka nevojë për diskutime të reja strategjike dhe se rregullorja e propozuar nuk do të sjellë rezultate efektive në praktikë.

Në këtë moment, ndërhyri Giorgia Meloni, e cila kritikoi ashpër vendimin e qeverisë spanjolle për legalizimin e një numri të madh emigrantësh pa dokumente. Sipas saj, kjo politikë nuk ka ndikim vetëm brenda Spanjës, por krijon pasoja edhe për vendet e tjera të Bashkimit Evropian, duke ndikuar në mënyrën e menaxhimit të flukseve migratore në nivel rajonal.

Debati u tensionua më tej me përfshirjen e kryeministrit belg Bart De Wever, i cili mbështeti qëndrimin e Frederiksen, duke deklaruar shkurtimisht: “Unë jam në ekipin e Mettes”.

Për të shmangur përshkallëzimin e mëtejshëm të debatit, presidenti i Këshillit Europian, António Costa, vendosi të ndërpresë diskutimin, duke bërë të ditur se çështja e migracionit do të trajtohet në mënyrë më të detajuar në një samit të ardhshëm të BE-së.