Një protestues ka bërë thirrje publike për largimin e kryeministrit Edi Rama dhe ish-kryeministrit Sali Berisha, gjatë një deklarate për mediat në Tiranë, ku ngriti shqetësime mbi gjendjen e shërbimeve publike dhe standardin e ndërtimeve në vend.

Ai u shpreh se ndryshimi politik duhet të vijë përmes një procesi të qetë dhe pa tensione, duke theksuar rolin e të rinjve në të ardhmen e vendit.

“Kam ardhur me forcën e shpirtit të mbështes këtë forcën e rinisë… Kryeministri të largohet butë, mendoj se kjo rini edhe do t’i falë një pjesë të fajit”, u shpreh protestuesi.

Gjatë fjalës së tij, ai ngriti shqetësime edhe për mungesën e investimeve në sektorët jetikë, duke përmendur gjendjen e spitaleve dhe shkollave, si dhe cilësinë e ndërtimeve në vend.

“Ne nuk kemi spitale, nuk kemi shkolla. Të gjitha ndërtimet janë jashtë standardeve”, deklaroi ai, duke kërkuar gjithashtu më shumë vëmendje nga institucionet e drejtësisë, përfshirë SPAK-un, lidhur me zbatimin e ligjit në sektorin e ndërtimit.

Në deklaratën e tij, protestuesi iu referua edhe standardeve ligjore historike, duke përmendur Kodin e Hamurabit, të cilin e solli si shembull për përgjegjësinë e ndërtuesve në rastet e shkeljeve të sigurisë.

Deklaratat e tij u bënë në kuadër të një proteste ku pjesëmarrësit shprehën shqetësime të ndryshme sociale dhe ekonomike mbi situatën në vend.