Është inauguruar linja e re ajrore Tiranë–Toronto, një lidhje e drejtpërdrejtë që synon të forcojë më tej komunikimin ajror mes Shqipërisë dhe Kanadasë.

Në ceremoninë e hapjes, kryeministri Edi Rama u ndal te zhvillimet në sektorin e aviacionit në vend, duke deklaruar se përdorimi i transportit ajror nga qytetarët shqiptarë është rritur ndjeshëm në vitet e fundit.

Sipas tij, kur qeveria nisi mandatin, vetëm 6.5% e popullsisë kishte akses në udhëtimet ajrore, ndërsa aktualisht kjo shifër ka arritur në rreth 40%, si rezultat i hapjes së tregut dhe rritjes së konkurrencës në këtë sektor.

Rama theksoi se liberalizimi i tregut pas përfundimit të koncesionit të mëparshëm ka ndikuar në uljen e kostove të fluturimeve dhe në rritjen e lëvizshmërisë së qytetarëve, ndërsa shtoi se edhe rritja e të ardhurave ka luajtur rol në këtë zhvillim.

Duke folur për kompaninë ajrore, ai u shpreh se operimi i saj në treg është i motivuar nga interesi ekonomik, duke theksuar se zgjerimi i fluturimeve është një rezultat i natyrshëm i tregut.

Në fund të fjalës së tij, Rama falënderoi ambasadoren e Kanadasë për praninë në ceremoni, si dhe punonjësit e aeroportit, sigurisë dhe Policisë së Shtetit, duke vlerësuar përmirësimet në funksionimin e aeroportit ndër vite.