Gjykata e Posaçme e Apelit për Korrupsionin dhe Krimin e Organizuar ka vendosur të ndryshojë masën e sigurisë për Ilir Selmanin, një nga të pandehurit në procesin që lidhet me vrasjen e ish-policit Santiago Malko.

Vendimi u mor pasi Apeli pranoi kërkesën e Selmanit, duke konstatuar se masa e sigurisë “arrest në burg” kishte humbur fuqinë për shkak të kalimit të afateve ligjore të paraburgimit.

Si rrjedhojë, trupa gjykuese urdhëroi lirimin e menjëhershëm të të pandehurit nga ambientet e paraburgimit dhe transferimin e tij në banesën private në Tiranë, ku do të qëndrojë nën masën e sigurisë “arrest në shtëpi”.

Në vendimin e saj, Gjykata e Apelit ngarkon Prokurorinë dhe Policinë Gjyqësore me mbikëqyrjen e vazhdueshme të zbatimit të masës së re, duke garantuar qëndrimin e Selmanit në banesë.

Ilir Selmani është mes personave të akuzuar në dosjen e atentatit ndaj Santiago Malkos, i ekzekutuar në zonën e “Xhamllikut” në Tiranë në gusht të vitit 2019. Procesi gjyqësor ndaj të pandehurve vijon ende në strukturat e posaçme të drejtësisë.