Detaje të reja kanë dalë në dritë lidhur me vrasjen e 34-vjeçarit Eglant Koçi, trupi i të cilit u gjet i pajetë më 18 qershor në zonën e Cerrujës, mes Tiranës dhe Elbasanit.

Sipas informacioneve paraprake, nga këqyrja e trupit është konstatuar një plagë tejshpuese në pjesën e pasme të kokës, e dyshuar se është shkaktuar nga një armë zjarri. Megjithatë, shkaku i saktë i vdekjes pritet të përcaktohet pas ekspertizës mjeko-ligjore.

Trupi i viktimës është transportuar në morg, ku specialistët do të kryejnë ekzaminime të mëtejshme për të hedhur dritë mbi rrethanat e ngjarjes.

Identifikimi i 34-vjeçarit u bë nga familjarët e tij, pasi policia arriti të lokalizonte trupin me ndihmën e dronëve. Ai u gjet në një zonë të thellë të fshatit Cerrujë, në lagjen Domush, në gjendje të avancuar dekompozimi.

Në reagimin zyrtar, Policia e Tiranës bëri me dije se shërbimet policore dhe grupi hetimor, nën drejtimin e Prokurorisë, po vijojnë veprimet për zbardhjen e plotë të ngjarjes dhe dokumentimin e rrethanave të saj.

Eglant Koçi rezultonte i zhdukur prej rreth dy javësh. Në kuadër të hetimeve, autoritetet kanë shpallur në kërkim shokun e tij të ngushtë, Armand Shakaj, i cili dyshohet se mund të ketë lidhje me ngjarjen.

Hetimet vijojnë, ndërsa priten rezultatet e ekspertizës mjeko-ligjore dhe veprimet e mëtejshme të organeve ligjzbatuese.