Rama mbledh të shtunën Grupin Parlamentar të PS-së, në fokus negociatat me BE-në, investimi në Zvërnec dhe zhvillimi turistik i Sazanit

Kryeministri Edi Rama do të drejtojë paraditen e së shtunës mbledhjen e Grupit Parlamentar të Partisë Socialiste, ku përveç deputetëve socialistë do të marrin pjesë edhe anëtarët e kabinetit qeveritar.

Sipas informacionit të siguruar nga gazetari i Top Channel, Muhamed Veliu, mbledhja do të hapet nga kryetari i Grupit Parlamentar të PS-së, Taulant Balla, ndërsa më pas fjalën do ta marrë kryeministri Edi Rama.

Pika e parë e rendit të ditës lidhet me procesin e integrimit evropian. Deputetët do të informohen mbi përfundimet e Konferencës së 8-të Ndërqeveritare Shqipëri–Bashkimi Evropian, si dhe mbi ecurinë e deritanishme të negociatave për anëtarësimin e vendit në BE. Në këtë sesion, secili deputet do të ketë në dispozicion dy minuta për të ngritur pyetje ose për të kërkuar sqarime.

Një tjetër çështje e rëndësishme në agjendë është paketa e ligjeve që lidhen me procesin e integrimit evropian. Deputetët do të informohen mbi ndryshimet dhe nismat ligjore që konsiderohen të domosdoshme për përmbushjen e detyrimeve të Shqipërisë në rrugën drejt anëtarësimit në Bashkimin Evropian.

Pika që pritet të tërheqë më shumë vëmendje ka të bëjë me investimin në Zvërnec dhe interesin e shprehur për zhvillimin turistik të ishullit të Sazanit. Deputetët socialistë do të njihen me procedurat e ndjekura deri tani për këtë projekt, i cili ka qenë në qendër të diskutimeve publike gjatë javëve të fundit.

Në mbledhje është parashikuar gjithashtu një raportim nga Arbjan Mazniku, në cilësinë e bashkëkryetarit të Komisionit të Reformës Administrative. Ai do të informojë deputetët mbi ecurinë e reformës territoriale dhe hapat e ndërmarrë deri më tani në këtë proces.

Ndërkohë, Taulant Balla do të paraqesë një raport të zgjeruar mbi detyrat e lëna nga mbledhja e mëparshme e Grupit Parlamentar, duke u ndalur edhe te performanca e deputetëve socialistë dhe angazhimet e tyre politike.

Mbledhja do të mbyllet me fjalën e kryetarit të Partisë Socialiste, Edi Rama, dhe të kryetarit të Grupit Parlamentar, Taulant Balla.

Mbetet për t’u parë nëse gjatë fjalës së tij kryeministri Rama do të komentojë zhvillimet e fundit që lidhen me deputeten Martjana Koçeku, si edhe deklaratat e kryetares së Kuvendit, Elisa Spiropali, lidhur me protestën, të bëra publike përmes një statusi të gjatë në rrjetin social Facebook rreth 10 ditë më parë.