Elbasan, 19 Qershor 2026 – Ngjarja e rëndë e zhdukjes së të riut Eglant Koçi është zbardhur tragjikisht, pas gjetjes së trupit të tij të pajetë në fshatin Cerrujë. Familjarët kanë bërë identifikimin zyrtar të viktimës, i cili rezultonte i humbur pa gjurmë prej dy javësh. Trupi u lokalizua nga forcat e policisë pas një operacioni kërkimi të shtrirë në terren me ndihmën e dronëve, për shkak të zonës së thyer.

Nga këqyrja paraprake e trupit, i cili u gjet në gjendje të avancuar dekompozimi, ekspertët ligjorë kanë konstatuar një plagë tejshpuese në pjesën e pasme të kokës. Kjo plagë dyshohet se është shkaktuar nga një qitje me armë zjarri nga pas, çka përforcon pistën e një ekzekutimi. Trupi i viktimës është dërguar menjëherë në morgun e spitalit, ku do t’i nënshtrohet një ekspertize të plotë dhe të detajuar mjeko-ligjore për të përcaktuar kohën dhe rrethanat ekzakte të vdekjes.

Paralelisht me gjetjen e trupit, policia ka shpallur në kërkim autorin e dyshuar të këtij krimi të rëndë, i cili rezulton të jetë shoku i ngushtë i viktimës, shtetasi Armand Shakaj.

Dyshimet e grupit hetimor ndaj tij ishin ngritur që përpara gjetjes së trupit. Gjatë kontrolleve të ushtruara në zyrën e Armando Shakajt, ekspertët e kriminalistikës kishin zbuluar gjurmë të djegies së barutit, si dhe një shenjë dëmtimi në mur, e cila përputhet me goditjen e një predhe plumbi. Këto prova materiale e lidhin direkt të dyshuarin me skenën e mundshme të krimit, ndërsa vijon puna e strukturave të policisë për lokalizimin dhe vënien e tij përpara drejtësisë.